गोडैता – सर्लाहीमा एक महिलाको शव फेला परेको छ। जिल्लाको बरहथवा नगरपालिका–१२, लौकठमा मंगलबार स्थानिय ३५ वर्षीया लिलावती देवी महतोको शव घर भन्दा केहि दुरीको खेतमा भेटिएको हो।
प्रहरीको प्रारम्भिक अनुसन्धान अनुसार महतोको हत्या भएको हुन् सक्ने आशंका गरिएको छ। महतोको शरिर, अनुहार र घाँटीमा गहिरो चोट देखिएको छ। स्थानीयले उक्त स्थानमा शव देखेपछि प्रहरीलाई गरेका थिए। स्थानीयको खबर पाए लगत्तै इलाका प्रहरी कार्यालय बरहथवाबाट प्रहरीको टोलि खटिएर घटनास्थलको प्रकृति मुचुल्का तयार पारेको र शवलाई परिक्षणका लागि जिल्ला सदरमुकाम मलंगवास्थित प्रादेशिक अस्पतालमा लगिएको बताईएको छ।
साथै, सोहि घटनामा प्रहरीले उनका श्रीमान ३८ वर्षीय शंकर महतो र उनकी सौता २१ वर्षीया सजनदेवी महतोलाई पक्राउ गरेको छ। घरमा पटक-पटक झै-झगडा हुने गरेको र घटना घटेको अघिल्लो दिन अर्थात सोमबार पनि घरमा झगडा भएको कुरा खुल्न आएको प्रहरीले जनाएको छ। पक्राउ परेका दुई जनालाई हिरासतमा राखिएको छm भने मृतक महतोको शव अहिले जिल्ला सदरमुकाम मलंगवास्थित प्रादेशिक अस्पतालमा राखेर घटनाको अनुसन्धान भईरहेको प्रहरीले जनाएको छ।
