सर्लाही – प्रहरी प्रधान कार्यालयले इलाका प्रहरी कार्यालय पोखरीया पर्साका प्रहरी निरीक्षक (इन्स्पेक्टर) राजन ढकाललाई पाँच महिना नपुग्दै तानेको छ । आइतबार प्रहरी प्रधान कार्यालयले ढकाललाई तानेर उनको ठाउँमा प्रहरी प्रधान कार्यालबाट अर्का इन्स्पेक्टर स्वरुप शर्मालाई पठाएको हो ।
प्रहरी नियमावलीमा प्रहरी अधिकारीको साधारणतया एक वर्ष नपुग्दै सरुवा नगरिने भन्ने उल्लेख छ । तर, ढकाललाई भने पाँच महिना नपुग्दै तानेर शर्मालाई पठाइएको हो । भारतीय सीमा जोडिएको पोखरीय नाकामार्फत अवैधबस्तु ओसारपसारका घटना बढेको र आर्थिक चलखेलमा इन्स्पेक्टर ढकालको भूमिका शंकास्पद देखिएपछि उनलाई फिर्ता बोलाइएको प्रहरी प्रधान कार्यालयका एक उच्च अधिकारीले जानकारी दिए।
केही दिनअघि मधेस प्रदेश प्रहरी प्रमुख डीआईजी यज्ञविनोद पोखरेलको भूमिका समेत शंकास्पद देखिएपछि उनको समेत सरुवा गरिएको थियो । त्योबाहेक प्रहरी प्रधान कार्यालयले लामो समयदेखि मधेस प्रदेशमा कार्यरत दर्जन प्रहरीलाई हेडक्वाटर तानेको छ । प्रहरी प्रवक्ता डीआईजी दानबहादुर कार्कीले पनि इन्स्पेक्टर ढकालको काम सन्तोषजनक नदेखिएपछि फिर्ता बोलाइएको बताए । – बाह्रखरीबाट साभार
