सर्लाही – मधेश प्रदेश सरकारको नेतृत्व एक वर्षअघि पाएको जनमत पार्टी अब आलोपालो सहमतिअनुसार नेतृत्व हस्तान्तरण गर्न नचाहेपछि सत्तारुढ गठबन्धनमा नेतृत्वको रस्साकस्सी चुलिएको छ। कांग्रेस र एमालेले नेतृत्व सुम्पन माग गर्दै दबाब बढाइरहेका छन् भने जनमत भने सत्तामा टाँसिरहन खोजेको देखिएको छ।

सत्तारुढ चार दल जनमत, कांग्रेस, एमाले र लोसपाबीच एक/एक वर्षमा सरकारको नेतृत्व गरिने सहमति भए पनि कार्यान्वयनमा ल्याउने विषयमा विवाद उत्पन्न भएको छ। कांग्रेस र एमालेले बजेटपछि सत्ता हस्तान्तरण हुने अपेक्षा राखेका थिए। तर बजेट पारित भएपछि पनि जनमतको कुनै तत्परता नदेखिएपछि सत्ता समीकरण पुनः अस्थिर बन्दै गएको छ।

मुख्यमन्त्री सतीशकुमार सिंह नेतृत्वको सरकार सञ्चालनमा कांग्रेस र एमालेको प्रभाव बढ्दै जाँदा जनमतभित्र असन्तोष देखिएको छ। बजेट निर्माणमा प्रभाव नपरेको भन्दै जनमत अध्यक्ष डा. सीके राउतले कांग्रेस र एमालेमाथि आरोप लगाएका थिए। तर उनले सरकारबाट अलग हुने संकेत नदिएपछि शक्ति सन्तुलन कांग्रेस-एमालेतिर मोडिने संकेत देखिएको छ।

सहमति कार्यान्वयन नभए राजनीतिक बेइमानी
कांग्रेसका मधेश प्रदेश प्रमुख सचेतक कुमारकान्त झाका अनुसार, बजेटपछिको सहमतिअनुसार अब सरकारको नेतृत्व कांग्रेसले पाउनुपर्छ। उनले जनमतको हठका कारण सहमति कार्यान्वयनमा समस्या आएको आरोप लगाए।

उनका अनुसार, सत्ता साझेदार दलहरू एमाले, लोसपा र कांग्रेस सबै जनमतलाई सहमतिमा बाँध्न चाहन्छन्। कांग्रेस सभापति शेरबहादुर देउवाले पनि केही साताअघि मधेशको नेतृत्व कांग्रेसले गर्नुपर्ने बताएका थिए। त्यसयता, मधेशमा सत्ता समीकरण परिवर्तनको प्रयास तीव्र भएको छ।

जनमतको अडान : हामी हस्तान्तरण गर्दैनौँ
यता, जनमत संसदीय दलका नेता महेशप्रसाद यादवले गठबन्धनभित्र आलोपालो सरकारको नेतृत्वबारे कुनै स्पष्ट सहमति नभएको दाबी गरे। उनका अनुसार, “कांग्रेस र एमालेले भनेको आधारमा सरकार छोड्न सकिँदैन।” यसले सत्ता हस्तान्तरण सहज नहुने संकेत दिएको छ।

जनमतले सत्ता नछोड्ने अडान लिएपछि कांग्रेस र एमाले दबाब सिर्जना गर्न विभिन्न रणनीति बनाउँदैछन्। यसैबीच, कांग्रेसका मधेश प्रदेश सभापति कृष्णप्रसाद यादव नेतृत्व हस्तान्तरणबारे पार्टी केन्द्रसँग छलफल गर्न काठमाडौं पुगेका छन्।

८ वर्षको प्रतीक्षा र कांग्रेसको बेचैनी
मधेश प्रदेशमा गठनपछि अहिलेसम्म कांग्रेसले सरकारको नेतृत्व पाएको छैन। यसअघि जसपाको नेतृत्वमा सरकार चलेको थियो भने अहिले जनमत नेतृत्वको सरकार सञ्चालनमा छ।

अबको पालो कांग्रेसको हो भन्ने धारणा पार्टी कार्यकर्ता र नेताहरूमा बढ्दै गएको छ। कांग्रेसका एक नेताका शब्दमा, “हामीले मिहिनेत गरेर मधेशमा पार्टी दोस्रो ठूलो बनायौँ, तर सत्तामा बस्नै पाइएन। अब नेतृत्व नलिए धरातल कमजोर हुन्छ।”