गोडैता – चालु आर्थिक वर्ष २०८१/०८२ मा सर्लाहीको गोडैता नगरपालिकाले संघीय सरकारबाट प्राप्त बजेटमध्ये ३७ लाख ५७ हजार ४६६ रुपैंया खर्च गर्न नसकेर फ्रिज भएको छ। नगरपालिकाले चालूतर्फ प्राप्त गरेको २१ करोड ७१ लाख ८५ हजार रुपैंयामध्ये २१ करोड ३४ लाख २७ हजार ५३४ रुपैंया मात्र खर्च गरेको छ।

संघीय सरकारबाट प्राप्त बजेटबाहेक गोडैता नगरपालिकाले प्रदेश सरकार, मालपोतलगायत राजस्व बाँडफाँड र अन्य आन्तरिक आम्दानीसमेत खर्च गरेको छ। तर, आर्थिक कार्यविधि तथा वित्तीय उत्तरदायित्व नियमावली, २०७७ को प्रावधानअनुसार असार महिनामा भुक्तानी गर्नुपर्ने खर्च कम्तीमा ७ दिनअघि नै सम्पन्न गर्नुपर्ने व्यवस्था छ।

सोहीअनुसार असार २५ गते राति १२ बजेपछि सबै सरकारी भुक्तानी रोकिएको कोष तथा लेखा नियन्त्रक कार्यालयका प्रमुख कोष नियन्त्रक पुष्प प्रसाद गुरागाईंले बताए। “नियमावली अनुसार समयमै खर्चको प्रक्रिया पूरा गर्न नसक्दा बजेट फ्रिज भएको हो,” गुरागाईंले भने, “यो रकम विकास निर्माण र सेवा प्रवाहमा उपयोग हुन सक्थ्यो, तर कार्ययोजनाको प्रभावकारी कार्यान्वयन नहुँदा यस्तो अवस्था आयो।”

गोडैता नगरपालिकाको यो खर्च प्रक्रियाले स्थानीय विकासमा अवरोध पुगेको भन्दै स्थानीयवासीले असन्तुष्टि जनाएका छन्। बजेट फ्रिज हुँदा सडक, खानेपानी, शिक्षा र स्वास्थ्यजस्ता आधारभूत क्षेत्रमा लगानी हुन नसकेको स्थानीयहरुको गुनासो छ।

सर्लाहीका पालिकाहरूकमा संघीय सरकारबाट प्राप्त बजेट खर्च र फ्रिज कसको कति ?