जनकपुर – भारतको हिमाचल प्रदेश, कुल्लु जिल्लाको मणिकरण उपत्यकामा रहेको पीनी गाउँमा साउन महिनाको अन्तिम पाँच दिन विवाहित महिलाहरूले कपडा नलगाउने परम्परा आज पनि यथावत् रूपमा कायम छ।

स्थानीय परम्पराअनुसार साउनको अन्तिम पाँच दिन महिलाहरू निर्वस्त्र बस्ने चलन छ। यद्यपि अहिले पूर्ण रूपमा निर्वस्त्र नबसी शरीरमा पातलो ऊनी कपडा (स्थानीय भाषामा पट्टु) ओढ्ने प्रचलन बढेको छ।

यो परम्परा सयौं वर्षदेखि चलिआएको मानिन्छ। यस परम्पराको पछाडि एउटा पौराणिक कथा जोडिएको छ। स्थानीय जनविश्वास अनुसार एक समय पीनी गाउँमा राक्षसहरूको आतंक फैलिएको थियो।

ती राक्षसहरू राम्रा लुगा लगाएका महिलाहरूलाई अपहरण गर्थे। त्यस संकटबाट गाउँलाई बचाउन ‘लहुआ घोंड’ नामक देवताले ती राक्षसहरूलाई परास्त गरेको विश्वास गरिन्छ। यो घटना भाद्रपद महिनाको पहिलो दिन भएको मानिन्छ। त्यसैको सम्झनामा यो परम्परा सुरु गरिएको हो।

परम्पराअनुसार ती पाँच दिन महिलाहरू कपडा नलगाई वा पट्टु ओढी बस्छन्। पति–पत्नीबीच कुराकानी हुँदैन। पुरुषहरूलाई मासु र मदिरा सेवन गर्न कडाइका साथ निषेध गरिएको हुन्छ। यदि नियमको उल्लंघन गरियो भने देवता रिसाउने र गाउँमा विपत्ति आउने जनविश्वास छ।

गाउँलेहरू यो परम्परालाई धर्म, परम्परा र सुरक्षाको प्रतीकका रूपमा श्रद्धापूर्वक पालन गर्छन्। आधुनिक समयमा अभ्यासको स्वरूपमा केही परिवर्तन भए पनि विश्वास र भावनामा कुनै ह्रास आएको छैन।