सर्लाही – रुपन्देही-३ मा हुन लागेको उपनिर्वाचनलाई लक्षित गर्दै नाउपा नेता रेशम चौधरी नजिकको समूहले स्वतन्त्र उम्मेदवारी दिने तयारी गरेको छ। नागरिक उन्मुक्ति पार्टी आयोगमा दर्ता हुन नसकेपछि चौधरीले सामाजिक सञ्जालमार्फत आफ्नो असन्तुष्टि पोख्दै नयाँ रणनीति सार्वजनिक गरेका हुन्।
श्रीमती तथा नाउपा सभामुख रन्जिता श्रेष्ठसँगको मतभेदकै कारण दल दर्ता प्रक्रियामा अवरोध भएको प्रसंग उल्लेख गर्दै उनले पार्टी नेतृत्वलाई प्रश्न गरेका छन्। “निर्वाचन प्रयोजनका लागि दल दर्ता नहुनु मेरो कमजोरी होइन। अध्यक्ष म होइन, तर दोष भने मेरो थाप्लोमै थुपारिन्छ,” चौधरीले लेखेका छन्।
उनले केन्द्रीय समितिको बैठकसमेत नबसेको र पार्टी सञ्चालनमा कमजोरी भएको आरोप लगाएका छन्। चौधरीले आफ्नो समूह रुपन्देही-३ बाट उम्मेदवार उठाउने दाबी गर्दै प्रचारप्रसारमा छिट्टै आफैं सक्रिय हुने बताएका छन्। उनले पार्टीभित्र विभाजन गराउनेलाई मात्र होइन, समूहमैबाट बहिष्कार गर्नुपर्ने सुझाव पनि दिएका छन्।
उनको भनाइमा, “दुश्मनको सल्लाहमा लागेर युद्ध जितिन्न। हामी सहयोगी मात्र होइन, सहयोद्धा पनि हौं। समस्या चर्काउने होइन, समाधानतिर लागौं।” यससँगै, रुपन्देही-३ को उपनिर्वाचन अब नाउपाभित्रको विवादसँगै स्वतन्त्र उम्मेदवारीले पनि थप रोचक मोड लिने देखिएको छ।
तपाईको प्रतिक्रिया !
सम्बन्धित समाचार
