मलंगवा – सर्लाहीको कविलासी नगरपालिकाका नगर प्रमुख र उपप्रमुखले सुविधा र इन्धन खर्चमा कानुन उल्लङ्घन गरेको महालेखा परीक्षकको ६२औं प्रतिवेदनमा खुलासा भएको छ। प्रतिवेदनले उक्त खर्चमा पनि अनियमित भएको ठहर गरेको छ।
प्रतिवेदन अनुसार नगर प्रमुख ब्रहम देव राय र उपप्रमुख पुनम कर्णले मासिक १,५०० लिटर इन्धन पाउने व्यवस्था भए पनि पनि क्रमशः ७,३४० लिटर र २,३६१ लिटर इन्धन खर्च गरेका छन्। यसरी कुल ५,२०१ लिटर बढी इन्धन प्रयोग हुँदा ८,५८,१६५ रुपैयाँ अतिरिक्त भुक्तानी भएको छ।
प्रतिवेदनले यसलाई कानुन उल्लंघन र पारदर्शिताको कमीको उदाहरणको रूपमा देखाएको छ। ऐन अनुसार, पदाधिकारीले यातायात भत्ता पाउँदा इन्धन भुक्तानी पाउन नहुने स्पष्ट व्यवस्था छ र कुनै हालतमा दोहोरो सुविधा दिन नपाइने भनिएको छ। तर कविलासी नगरपालिकाले पदाधिकारीलाई यातायात भत्ता पाएको अवस्थामा पनि इन्धन भुक्तानी दिएको देखिएको छ।
प्रतिवेदनमा उल्लेख तथ्याङ्क:
| पदाधिकारी | तोकिएको वार्षिक ईन्धन | खर्च भएको ईन्धन | बढी प्रयोग | बढी रकम (रु.) |
|---|---|---|---|---|
| नगर प्रमुख ब्रहम देव राय | १,५०० लिटर | ७,३४० लिटर | ४,३४० लिटर | ७,१६,१०० |
| नगर उपप्रमुख पुनम कर्ण | १,५०० लिटर | २,३६१ लिटर | ८६१ लिटर | १,४२,०६५ |
| जम्मा | – | – | ५,२०१ लिटर | ८,५८,१६५ |
महालेखा परीक्षकले यस घटनालाई स्थानीय तहमा खर्च व्यवस्थापन र पारदर्शिता सुनिश्चित गर्न सुधारात्मक कदम चाल्नुपर्ने उदाहरणको रूपमा उल्लेख गरेका छन्। यस्तो दोहोरो सुविधा र मनपरी इन्धन भुक्तानीले जनताको विश्वासमा असर पुर्याउने भएकाले सार्वजनिक जानकारी, लेखापरीक्षण, र निगरानी प्रणाली कडा गर्न आवश्यक छ।
तपाईको प्रतिक्रिया !
सम्बन्धित समाचार
