जनकपुर – इन्डोनेसियाको मकासर शहरमा शुक्रबार प्रदर्शनकारीको आक्रोश चरमसीमामा पुगेको छ। विरोधका क्रममा क्षेत्रीय संसद भवनमा आगजनी हुँदा कम्तीमा तीन जनाको मृत्यु भएको र पाँच जना घाइते भएको अधिकारीहरूले जानकारी दिएका छन्।
प्रदर्शनकारीहरूले भवनमा आगो लगाएपछि केहीले हाम फाल्ने प्रयास गर्दा घाइते भएका थिए। विरोधको मुख्य कारण सांसदहरूको तलब र भत्तामा अत्यधिक वृद्धि भएको मानिएको छ।
अघिल्लो घटनामा, प्रहरीले मोटरसाइकलमा गइरहेका एक डेलिभरी चालकलाई दुर्घटनाग्रस्त बनाउँदा मृत्यु भएपछि आक्रोश थप बढेको थियो। यस घटनापछि प्रदर्शनकारीहरूले प्रहरी र सरकारी कार्यालयहरूमा ढुङ्गा तथा पटाका प्रहार गरेका थिए। प्रहरीले प्रदर्शन नियन्त्रण गर्न अश्रुग्यास प्रयोग गरेको थियो।
मृतक चालकसँग सम्बन्धित घटनामा सात प्रहरी अधिकारीलाई हिरासतमा लिइएको छ। स्वास्थ्य अधिकारीहरूले २०० भन्दा बढी मानिस घाइते भएको पुष्टि गरेका छन्। राष्ट्रपति प्रबोवो सुबियान्तोले घटनापछि शान्ति कायम राख्न अपिल गर्दै अनुसन्धानको आदेश दिएका छन् र मृतक चालकको परिवारलाई भेटेका छन्।
तपाईको प्रतिक्रिया !
सम्बन्धित समाचार
