सर्लाही – अहिलेसम्म हामी सबैले बिजुली भन्नासाथ तार, प्लग र सकेटको कल्पना गर्थ्यौँ । घरदेखि उद्योगसम्म बिजुली पुर्याउन केबल अनिवार्य मानिन्थ्यो । यद्यपि मोबाइल फोनका लागि वायरलेस चार्जर देखिए पनि, पूरै बिजुली नै तार बिना बग्न सक्छ भन्ने कुरा असम्भवजस्तै लाग्थ्यो । तर फिनल्याण्डका वैज्ञानिकहरूले यो असम्भवलाई सम्भव बनाएर देखाएका छन् ।
हेलसिंकी विश्वविद्यालय र ओउलु विश्वविद्यालयका अनुसन्धानकर्ताहरूले हावा मार्फत बिजुली पठाउने प्रयोग सफलतापूर्वक प्रदर्शन गरेका छन् । यस प्रयोगमा ध्वनि तरंग, लेजर र रेडियो फ्रिक्वेन्सीलाई एउटै प्रणालीमा जोडिएको छ । वैज्ञानिकहरूका अनुसार यो प्रविधि केवल नयाँ उपकरण मात्र होइन, भौतिकशास्त्रका तीन फरक सिद्धान्तको अनौठो संयोजन हो ।
उच्च-तीव्रताका अल्ट्रासोनिक ध्वनि तरंगले हावाको घनत्व परिवर्तन गरी एउटा अदृश्य बाटो तयार गर्छ । त्यसपछि लेजरको सहायताले त्यो बाटो हुँदै ऊर्जा टाढासम्म पठाइन्छ । रिसीभरमा पुगेपछि रेडियो फ्रिक्वेन्सी प्रविधिले त्यस ऊर्जालाई उपयोगी बिजुलीमा रूपान्तरण गर्छ । यस अवधारणालाई वैज्ञानिकहरूले ‘ध्वनिक तार’ नाम दिएका छन् ।
वैज्ञानिकहरूको भनाइमा, यो प्रक्रिया पानी पाइपमार्फत बगाएजस्तै हो । फरक यति मात्र हो—यहाँ पाइप देखिँदैन, पानी होइन बिजुली बग्छ, र पाइप ध्वनि तरंगबाट बनेको हुन्छ ।
यदि यो प्रविधि व्यवहारमा आयो भने भविष्यका घरहरू पूर्ण रूपमा फरक देखिन सक्छन् । भित्तामा सकेट खोजिरहनु पर्दैन, तार काटिने वा सर्ट सर्किट हुने जोखिम घट्छ । मोबाइल, ल्यापटप वा अन्य उपकरणहरू कोठामा जहाँ राखे पनि हावाबाटै चार्ज हुन सक्ने सम्भावना खुल्छ ।
तर अहिलेका लागि यो प्रविधि प्रयोगशालामै सीमित छ । वास्तविक जीवनमा कति शक्तिशाली हुन्छ, कुन–कुन उपकरण चलाउन सकिन्छ र मानव स्वास्थ्यका लागि सुरक्षित हुन्छ कि हुँदैन भन्ने विषयमा थप परीक्षण हुन बाँकी छ । यद्यपि, फिनल्याण्डका वैज्ञानिकहरूको यो खोजले भविष्यमा ताररहित बिजुलीको युग आउन सक्छ भन्ने बलियो संकेत दिएको छ ।
तपाईको प्रतिक्रिया !
सम्बन्धित समाचार
