मलंगवा – गलत झारनाशक औषधिको प्रयोगका कारण सर्लाहीको रामनगर गाउँपालिका – १ का किसान राजमंगल रायको उखु बालीमा ठूलो क्षति पुगेको छ।

करिब तीन बिघा क्षेत्रफलमा लगाइएको उखु खेती सुक्न थालेपछि किसान राय चिन्तित बनेका छन्। रायका अनुसार उनले खेतमा उम्रिएको घाँसपात नियन्त्रण गर्न जिल्लाकै बरहथवा बजारस्थित एक कृषि औषधि पसलबाट झारनाशक औषधि खरिद गरेका थिए।

पसलेले दिएको सल्लाहअनुसार उक्त औषधि प्रयोग गरेपछि केही दिनमै उखुका बोट पहेँलिन थालेका थिए। विस्तारै बोट सुक्दै गएपछि बाली नै नष्ट हुने अवस्थामा पुगेको उनले बताए।

उनले औषधि बिक्री गर्ने पसलेकै कारण आफ्नो खेतीमा क्षति पुगेको दाबी गरेका छन्। उखु बालीका लागि उपयुक्त नभएको झारनाशक औषधि दिइएका कारण बाली नष्ट भएको उनको भनाइ छ।

“घाँस हटाउन औषधि मागेको थिएँ, तर पसलेले दिएको औषधि प्रयोग गरेपछि उखु नै सुक्न थाल्यो,” रायले धडकन एफ एमसंग भने, “गलत विषादी दिएका कारण मेरो तीन बिघाको उखु खेती नष्ट भएको छ।”

स्थानीय किसानहरूका अनुसार कृषि औषधि खरिद गर्दा अधिकांश किसान पसलेको सल्लाहमै निर्भर हुने गरेका छन्। तर प्राविधिक ज्ञानबिना बिक्री गरिने विषादी तथा झारनाशक औषधिका कारण किसानहरू पटक पटक घाटा बेहोर्न बाध्य हुने गरेको उनीहरूको भनाइ छ।

कृषि क्षेत्रका जानकारहरूका अनुसार बालीको प्रकृतिअनुसार उपयुक्त झारनाशक छनोट गर्न नसक्दा मुख्य बालीमै गम्भीर असर पर्न सक्छ। त्यसैले विषादी तथा झारनाशक औषधिको प्रयोगअघि कृषि प्राविधिकको सल्लाह लिन आवश्यक हुने उनीहरू बताउँछन्।

पीडित किसान रायले घटनाको छानबिन गरी दोषीमाथि कारबाही गर्न तथा आफूले व्यहोरेको क्षतिको उचित क्षतिपूर्ति उपलब्ध गराउन सम्बन्धित निकायसँग माग गरेका छन्। साथै, स्थानीय किसानहरूले कृषि औषधि पसलहरूको नियमित अनुगमन र नियन्त्रण आवश्यक रहेको बताएका छन्।