साङ्केतिक तस्बिर

सर्लाही – सेवाग्राहीमाथि आफ्नै कार्यकक्षभित्र कुटपिट गरेको आरोप लागेका यातायात व्यवस्था कार्यालय बाराका निमित्त कार्यालय प्रमुख चिन्तन आचार्यलाई प्रहरीले पक्राउ गरेको छ। सामाजिक सञ्जालमा घटनाको भिडियो सार्वजनिक भई व्यापक आलोचना भएपछि प्रहरीले अनुसन्धानका लागि उनलाई नियन्त्रणमा लिएको हो।

जिल्ला प्रहरी कार्यालय बाराका अनुसार धनुषा प्रहरीको समन्वयमा आचार्यलाई कार्यालयमै बोलाएर नियन्त्रणमा लिइएको हो। प्रहरीका अनुसार भिडियो सार्वजनिक भएपछि घटनाको वास्तविकता बुझ्न अनुसन्धान प्रक्रिया अघि बढाइएको छ।

बाराका प्रहरी प्रमुख एसपी नरेन्द्र कुँवरले सार्वजनिक भएको भिडियोको आधारमा घटनाबारे विस्तृत अनुसन्धान भइरहेको जानकारी दिए। भिडियोमा कार्यालयभित्र विवाद चर्किएपछि आचार्यले सेवाग्राहीमाथि हातपात गरेको देखिन्छ।

प्रहरीका अनुसार उक्त घटना सन् २०२६ को मार्च १७ (फागुनको तेस्रो साता) मा भएको थियो। भिडियो पुरानो भए पनि हाल मात्रै सार्वजनिक भएपछि अनुसन्धान अघि बढाइएको प्रहरीले जनाएको छ।

प्रारम्भिक अनुसन्धानबाट कुटपिटमा परेका व्यक्ति अरुण कुशवाहा रहेको खुलेको छ। उनी आफूलाई पत्रकार बताउँदै श्रीमती र सालीको सवारी चालक अनुमतिपत्र (लाइसेन्स) सम्बन्धी कामका लागि कार्यालय पुगेका थिए। सो क्रममा कर्मचारीसँग विवाद भएपछि कुशवाहाले गालीगलौज र दबाब दिएको आरोप छ। त्यसपछि स्थिति तनावपूर्ण बन्दै जाँदा कार्यालय प्रमुख आचार्यले हातपात गरेको प्रहरीको प्रारम्भिक निष्कर्ष छ।

प्रहरीका अनुसार घटना भएकै दिन दुवै पक्षबीच मिलापत्र गराएर विषय टुंग्याइएको देखिए पनि भिडियो सार्वजनिक भएपछि पुनः अनुसन्धान सुरु गरिएको हो। घटनाका बेला ट्राफिक प्रहरीका सई भानुभक्त आचार्यसहित दुई जना प्रहरी कार्यालय परिसरमै उपस्थित रहेको पनि खुलेको छ।

घटनाको भिडियो सार्वजनिक भएसँगै चौतर्फी आलोचना भएपछि मधेश प्रदेश सरकारको श्रम तथा यातायात मन्त्रालयले पनि चासो देखाउँदै आचार्यलाई मन्त्रालयमा हाजिर हुन निर्देशन दिएको थियो। तर मन्त्रालयमा उपस्थित हुनुअघि नै उनी प्रहरी नियन्त्रणमा परेका हुन्।

मन्त्रालयका सूचना अधिकारी सुनिल साहका अनुसार आचार्यको स्थानमा यातायात व्यवस्था कार्यालय बाराका अधिकृत रामस्वार्थ महतोलाई निमित्त कार्यालय प्रमुखको जिम्मेवारी दिइएको छ।

सरकारी कार्यालयभित्र सेवाग्राहीमाथि भएको भनिएको हातपातको घटना सार्वजनिक भएपछि मन्त्रालयले प्रशासनिक कारबाहीस्वरूप आचार्यलाई जिम्मेवारीबाट हटाउँदै मन्त्रालय तानेको जनाएको छ भने प्रहरीले घटनाबारे थप अनुसन्धान जारी राखेको छ।