काभ्रेपलाञ्चोक – नमोबुद्ध नगरपालिका–४ भकुण्डेस्थित प्रहरी चौकीका इन्चार्ज प्रहरी सहायक निरीक्षक (सई) गणेशप्रसाद श्रेष्ठलाई स्थानीयले होटलबाट युवतीसहित नियन्त्रणमा लिएर प्रहरीको जिम्मा लगाएका छन्।
स्थानीयका अनुसार श्रेष्ठलाई मध्यरातमा नमोबुद्धस्थित एक होटलबाट युवतीसहित भेटिएपछि नियन्त्रणमा लिइएको हो। जिम्मेवारीमा रहेका प्रहरी अधिकारी नै होटलमा युवतीसँग भेटिएपछि स्थानीयले घटनाबारे जिल्ला प्रहरी कार्यालय धुलिखेललाई जानकारी गराएका थिए।
सूचना पाएलगत्तै जिल्ला प्रहरी कार्यालय धुलिखेलबाट प्रहरी टोली घटनास्थल पुगेको थियो। त्यसपछि स्थानीयले नियन्त्रणमा लिएका श्रेष्ठसहित दुई जनालाई प्रहरीले जिल्ला प्रहरी कार्यालयमा ल्याएर घटनाबारे अनुसन्धान थालेको छ।
जिल्ला प्रहरी कार्यालय काभ्रेपलाञ्चोकका प्रमुख एसपी रविन कार्कीले स्थानीयबाट सूचना आएपछि श्रेष्ठलाई कार्यालयमा ल्याइएको पुष्टि गरेका छन्। उनका अनुसार श्रेष्ठसहित दुई जना अहिले प्रहरी नियन्त्रणमा छन् र घटनाबारे थप अनुसन्धान भइरहेको छ।
श्रेष्ठ गत जेठमा जिल्ला प्रहरी कार्यालय काभ्रेपलाञ्चोकबाट ‘उत्कृष्ट प्रहरी’का रूपमा समेत घोषित भएका थिए। तर, अहिले उनीमाथि जिम्मेवारी र प्रहरी आचरणविपरीत गतिविधि गरेको आरोपमा अनुसन्धान अघि बढाइएको छ।
यद्यपि, घटनाको वास्तविकता र श्रेष्ठमाथि लागेको आरोप अनुसन्धानपछि मात्रै स्पष्ट हुनेछ। अनुसन्धान पूरा नहुँदासम्म उनलाई दोषी ठहर गर्न नमिल्ने प्रहरीले जनाएको छ। घटनाले जिम्मेवारीमा रहेका प्रहरी अधिकारीको व्यक्तिगत आचरण, अनुशासन र संगठनको मर्यादामाथि समेत प्रश्न उठाएको छ।
तपाईको प्रतिक्रिया !
सम्बन्धित समाचार
