सर्लाही – रसुवामा भदौ १० गते आएको विनाशकारी बाढीपछि बेपत्ता तथा अलपत्र परेकाहरूको खोजी तथा उद्धारका क्रममा सर्लाहीका २९ वर्षीय सन्तोष कुमार शाहसहित मधेश प्रदेशका चार जनाको उद्धार गरिएको छ।
उद्धार टोलीले बाढी आएको सात दिनपछि भदौ १७ गते उनीहरूलाई रसुवाका विभिन्न स्थानबाट सुरक्षित स्थानमा ल्याएको हो। उद्धार गरिएकामध्ये अधिकांश रसुवाकै स्थानीय बासिन्दा रहेका छन्। तर, मधेश प्रदेशका विभिन्न जिल्लाबाट रसुवा पुगेका चार जना पनि उद्धार टोलीको सम्पर्कमा आएका छन्।
धुन्चेबाट उद्धार गरिएकाहरूमा सर्लाहीका २९ वर्षीय सन्तोष कुमार शाह, सप्तरीका २७ वर्षीय मिथलेश मण्डल, महोत्तरीका २५ वर्षीय हरिशंकर मण्डल र बाराका ४१ वर्षीय अशोक श्रेष्ठ रहेका छन्।
उनीहरू बाढीअघि के कामका लागि वा कुन उद्देश्यले हिमाली जिल्ला रसुवा पुगेका थिए भन्नेबारे भने अहिलेसम्म स्पष्ट जानकारी सार्वजनिक भएको छैन। बाढी आएको सात दिनसम्म उनीहरू कुन स्थानमा र कस्तो अवस्थामा रहेर सुरक्षित हुन सफल भए भन्ने विषय पनि खुल्न बाँकी छ।
त्यसैगरी, उद्धार गरिएका चारै जनाको स्वास्थ्य अवस्थाबारे समेत विस्तृत विवरण सार्वजनिक भएको छैन। उनीहरू सामान्य अवस्थामा छन् वा बाढीका कारण घाइते भएका छन् भन्नेबारे सम्बन्धित निकायले थप जानकारी दिन बाँकी रहेको छ।
तपाईको प्रतिक्रिया !
सम्बन्धित समाचार
