सर्लाही – जनकपुरधाममा छुरा प्रहारबाट एक युवकको हत्या भएको घटनामा आरोपित व्यक्तिसँग हतियार प्रदर्शन गर्दै सामाजिक सञ्जालका लागि भिडियो बनाएको विषय सार्वजनिक भएपछि सशस्त्र प्रहरीका एक जवानमाथि अनुसन्धान सुरु गरिएको छ।

अनुसन्धानको दायरामा रहेका सशस्त्र प्रहरी जवान ऋषि मण्डल हत्या आरोपित इर्साद खानसँग केही महिनाअघि बनाइएका टिकटक तथा रिल्स भिडियोमा देखिएका छन्। सार्वजनिक भएका भिडियोमा खानले खल्तीबाट खुकुरी निकालेर प्रदर्शन गर्नुका साथै गालीगलौज गर्दै हिंसात्मक चेतावनी दिएको सुनिन्छ। ती दृश्यमा जवान मण्डल पनि सँगै देखिएका छन्।

जनकपुरधाममा हालै भएको छुरा प्रहारको घटनामा खानको नाम जोडिएपछि उनीसँग जवान मण्डलले बनाएका पुराना भिडियोसमेत चर्चामा आएका हुन्। घटनापछि सार्वजनिक भएका ती दृश्यले सुरक्षाकर्मीको व्यक्तिगत आचरण, अनुशासन र आपराधिक गतिविधिमा संलग्न भएको आरोप लागेका व्यक्तिसँगको सम्बन्धबारे प्रश्न उठाएको छ।

बिहीबार साँझ जनकपुरधाममा भएको छुरा प्रहारबाट जनकपुरधाम उपमहानगरपालिका–५ का २४ वर्षीय आमिन साफीको मृत्यु भएको थियो। सोही घटनामा २५ वर्षीय इम्तियाज राइन गम्भीर घाइते भएका छन्।

प्रहरी अनुसन्धानअनुसार घटनामा संलग्न भएको आरोप लागेका खानलाई स्थानीयस्तरमा ‘गुण्डा’ भनेर चिनिने गरेको बताइएको छ। उनीसँग सशस्त्र प्रहरी जवान मण्डल देखिएका भिडियोमा रहेको गतिविधिलाई आधार बनाएर जवानको भूमिकाबारे अनुसन्धान अघि बढाइएको हो।

सुरक्षाकर्मीको जिम्मेवारी कानूनको पालना र शान्ति सुरक्षा कायम गर्नु हो। यस्तो जिम्मेवारीमा रहेका व्यक्तिले हिंसात्मक अभिव्यक्ति र हतियार प्रदर्शन गरिएका भिडियोमा देखिनुले संगठनको अनुशासन तथा व्यावसायिक आचरणबारे स्वाभाविक प्रश्न खडा गरेको छ।

यद्यपि, भिडियोमा सँगै देखिएकै आधारमा जवान मण्डलको कुनै कसुरमा संलग्नता पुष्टि हुँदैन। उनी र हत्या आरोपित खानबीचको सम्बन्ध, भिडियोको सन्दर्भ तथा जवानको वास्तविक भूमिकाबारे अनुसन्धानबाट थप तथ्य खुल्न बाँकी छ।