file image
मलंगवा – सर्लाहीको गोडैता नगरपालिका – ६, बगदहमा घाँटी काटिएको अवस्थामा एक बालिकाको शव फेला परेको छ। बुधबार दशैँका दिन स्थानीय लालबाबु राउतकी करिब १३ वर्षीया छोरी मौसम कुमारी राउतको शव आफ्नै उखुबारीमा फेला परेको हो।
जिल्ला प्रहरी कार्यालय सर्लाहीका निमित्त प्रहरी प्रवक्ता तथा सूचना अधिकारी प्रहरी निरीक्षक किशोर केसीका अनुसार बालिका बुधबार बिहान करिब १० बजे उखुको पात काट्न घरबाट निस्किएकी थिइन्।
साँझ स्थानीयले उनलाई मृत अवस्थामा देखेपछि करिब ४ः३० बजे प्रहरीलाई घटनाबारे जानकारी गराएका थिए। प्रहरी निरीक्षक केसीका अनुसार बालिकाको घाँटीमा धारिलो हतियारले काटेको देखिएको छ।
गोडैता नगरपालिका – ६ का वडाध्यक्ष सचिन्द्र महतोले बालिका बिहान उखुको पात काट्न खेतमा गएको र साँझ आफ्नै उखुबारीमा मृत अवस्थामा फेला परेको बताए। उनका अनुसार बालिकाले उखुबारीमा केही उखुका पातसमेत काटेकी थिइन्।
बालिकाको शव पोस्टमार्टमका लागि जिल्ला सदरमुकाम मलंगवास्थित प्रादेशिक अस्पतालमा राखिएको छ। घटनाबारे थप अनुसन्धान भइरहेको प्रहरी निरीक्षक केसीले बताए।
तपाईको प्रतिक्रिया !
सम्बन्धित समाचार
