सर्लाही – सप्तरीको राजगढ गाउँपालिका–२ कमलपुरमा प्रहरीको गोली लागेर एक स्थानीयको मृत्यु भएपछि बुधबार बिहान सो घटनाको विरोधमा स्थानीयवासीले प्रदर्शन गरेका छन्। उनीहरूले जिल्ला प्रहरी कार्यालय अगाडि टायर बालेर आक्रोश पोखेका हुन्।
मृतक लालु यादव स्थानीय विद्यालय व्यवस्थापन समितिका अध्यक्षसमेत थिए। मंगलबार राति मदिरा तस्करी नियन्त्रणका लागि प्रहरी गाउँ पुगेको थियो। सो क्रममा स्थानीय र प्रहरीबीच झडप भएको थियो। प्रहरीले तीन राउन्ड गोली चलाएको बताइएको छ, जसमा गोली लागेर करिब ३६ वर्षीय यादवको मृत्यु भएको हो।
प्रदर्शनमा उत्रिएका स्थानीयले प्रहरी ज्यादतीको आरोप लगाउँदै घटनामा संलग्न इन्स्पेक्टर वीरेन्द्र कुमार यादवमाथि कारबाहीको माग गरेका छन्। साथै, उनीहरूले निष्पक्ष छानबिनको माग समेत राखेका छन्।
जिल्ला प्रहरी कार्यालयका प्रवक्ता डिएसपी जितेन्द्रकुमार बस्नेतका अनुसार स्थिति नियन्त्रणमा लिन गोली चलाइएको थियो। यादवको तिघ्रामा गोली लागेको र उपचारको क्रममा मृत्यु भएको उनले जानकारी दिए। घटनास्थलबाट भारत तर्फ लैजाँदै गरिएको ८० भन्दा बढी कार्टुन मदिरा बरामद गरिएको प्रहरीको दाबी छ।
सम्बन्धित खबर:
– सप्तरीमा प्रहरीले चलाएको गोली लागेर एक जनाको मृत्यु
तपाईको प्रतिक्रिया !
सम्बन्धित समाचार
