सर्लाही – मधेश प्रदेशसभामा आज दिउँसो १ बजे बस्ने बैठकले सभामुख रामचन्द्र मण्डलविरुद्ध पेश भएको अविश्वास सम्बन्धी प्रस्तावमाथि बहस सुरु गर्ने तयारी गरेको छ। प्रदेशसभा सचिवालयले सामाजिक सञ्जालमार्फत बैठक सम्बन्धी सूचना सार्वजनिक गरेको हो।
कात्तिक २७ गते सात दलले बनेको गठबन्धनका ६४ जना प्रदेश सांसदहरूले पदको मर्यादा कायम राख्न नसकेको तथा आचरण पद अनुकूल नभएको आरोप लगाउँदै सभामुख मण्डलविरुद्ध प्रस्ताव दर्ता गराएका थिए। कानुनी व्यवस्था अनुसार एक साताभित्र उक्त प्रस्ताव सदनमा पेश गर्नुपर्ने हुँदा आजको बैठक बोलाइएको बताइएको छ।
प्रदेशसभाकी उपसभामुख बबिता राउत ईशरको निर्देशनमा बैठक बोलाइएको हो । मंगलबार सात दलीय गठबन्धनका ३२ जना प्रदेश सांसदले उपसभामुख ईशरलाई बैठक बोलाउन ज्ञापनपत्र बुझाएका थिए ।
यस घटनाक्रमले मधेश प्रदेशको राजनीतिक परिवेशमा नयाँ उतार चढाव ल्याउने अनुमान गरिएको छ। विश्लेषकहरूले सभामुखमाथिको यो प्रस्तावले प्रदेशको शक्ति सन्तुलनमा निर्णायक प्रभाव पार्न सक्ने बताएका छन्।
आजको बैठकले यस अविश्वास प्रस्तावबारे अन्तिम निर्णय ल्याउने कि प्रक्रिया थप लम्बिने भन्नेमा सबैको नजर केन्द्रित छ।
तपाईको प्रतिक्रिया !
सम्बन्धित समाचार
